Бишкек шаарынын мэриясы шаардыктарга борбордогу жалпы билим берүү мекемелерине балдарды кабыл алууда, өзгөчө кичи участоктор боюнча 1 жана 2-класстарды комплектөө бөлүгүндө мыйзамдуулукту камсыз кылуу боюнча жүргүзүлүп жаткан иштер жөнүндө маалымдайт.
Мэриянын тиешелүү кызматтары тарабынан жүргүзүлгөн текшерүүлөрдүн алкагында белгилүү мектептерге бекитилген турак жайларда балдарды массалык түрдө жалган каттоо учурлары болууда. Тактап айтканда, 20дан ашуун жашы жете элек катталган батирлер аныкталган.
Бул балдар чындыгында көрсөтүлгөн даректер боюнча жашабайт жана мындай иш-аракеттер белгилүү бир мектептен орун алуу максатында гана жүргүзүлөт. Мындай практика билим алууга бирдей жеткиликтүүлүктүн принциптерин бузат жана ушул даректер боюнча мыйзамдуу жашаган башка үй-бүлөлөргө зыян келтирет.
Бардык аныкталган фактылар Кыргыз Республикасынын мыйзамдарына ылайык укуктук баа берүү жана чараларды көрүү үчүн укук коргоо органдарына өткөрүлүп берилди.
Белгиленген тартипте:
* катталган дареги боюнча жашабаган балдар мектептерден чыгарылып, тиешелүү кичи участоктун чегинде иш жүзүндө жашаган жерине окууга жөнөтүлөт;
* социалдык коргоо органдары тарабынан башка бирөөнүн батиринде катталган балдардын абалын текшерүү боюнча иштер жүргүзүлөт;
* турак жай жана коммуналдык кызматтар катталган жашоочулардын жалпы санына жараша коммуналдык төлөмдөрдү эсепке алышат.
Урматтуу ата-энелер жана Бишкек шаарынын тургундары!
Мэрия шылуундук схемаларды колдонуудан, документтерди жасалмалоодон жана жалган каттоодон алыс болууга чакырат. Бул иш-аракеттер билим берүү тутумуна болгон ишенимди төмөндөтөт, социалдык чыңалууну жаратат жана административдик жана кылмыш жоопкерчилигине алып келет.
Мектептерге кабыл алууда ачык-айкындуулукту жана тартипти камсыздоо боюнча иштер улантылууда.
