Урматтуу шаар тургундары жана коноктор! Бишкек шаарынын мэриясы сиздерди Кыргыз Республикасынын көз карандысыздык күнүн майрамдоого арналган спорттук иш-чараларга катышууга чакырат.

Бишкек шаарынын мэриясынын дене тарбия жана спорт, туризм жана жаштар менен иштөө департаменти майрамдык спорттук иш-чараларды уюштурууда.

31-августта саат 10:00дөн 14:00гө чейин «Адинай» паркында шаар тургундары үчүн төмөнкү спорт түрлөрү боюнча мелдештер өтөт: аркан тартыш, ордо, тогуз коргоол, футбол, жеңил атлетика, кичи-футбол, шахмат жана параармрестлинг.

Мындан тышкары, 30-августта, майрамдын урматына, шаардын төрт району  боюнча кичи-футбол, аркан тартыш, шахмат, тогуз коргоол, ордо, кыймылдуу оюндар жана башка дисциплиналар боюнча турнирлер жана эстафеталар өтөт. Шаардын конокторуна жана тургундарына майрамдык маанай тартуулоо үчүн оюн аянтчалары жана мелдеш өткөрүү зоналары ар бир райондун парктарында жайгаштырылат.

30-августтагы спорттук иш-чаралардын жайгашкан жерлери:
•Ленин району -  Чүй проспекти Жаш Гвардия бульварынын кесилиши, башталышы: саат 10:00;
•Биринчи май району —  Ак-Босого жаңы конушу, Чүй, 52 дареги, башталышы: саат 10:00;
Малышев менен Кудрин көчөлөрүндөгү спорттук аянтчасында, саат 10:00;
•Свердлов району — Каражыгач токою, саат 11:00.
•Октябрь району —  «Рухий мурас», «Тунгуч» кичирайону, «Көк-Жар» жаңы конушу, №71 орто мектеп, башталышы: 16:00.

Майрамдык программа спортту жайылтууга, балдарды жана жаштарды активдүү жашоо образына үндөөгө, ошондой эле Бишкекте массалык спортту өнүктүрүүгө багытталган.

Бардык шаар тургундарын жана конокторду майрамдык программага катышууга, спортчуларды колдоого жана  майрамды бирге өткөрүүгө чакырабыз!