2025-жылдын 29-августунда Кыргыз Республикасынын Президентинин онлайн-форматта катышуусунда Бишкек шаарында билим берүү, маданият жана архив тармагындагы инфраструктураны жакшыртууга багытталган бир катар социалдык объекттер салтанаттуу түрдө пайдаланууга берилди.
Шаар мэри Айбек Джунушалиев “Ак-Бата” конушундагы 650 орундуу мектептин ачылыш аземине катышты. Жалпы аянты 5 миң чарчы метрден ашуун болгон билим берүү мекемесинде 22 окуу кабинети, анын ичинен 6 башталгыч класстар каралган.
Курулуш республикалык бюджеттен жана мамлекеттик казына облигацияларынын эсебинен каржыланган. Подрядчы — «Эталон Вин Спец Строй» ЖЧКсы.
Ошондой эле төмөндөгү объектилер пайдаланууга берилди:
Мурас-Ордо конушунда 280 орундуу бала бакча. Жалпы аянты 2 миң чарчы метрден ашык. Мекемеде ондогон жаңы жумуш орундары түзүлүүдө. Курулуш жергиликтүү бюджеттин эсебинен ишке ашырылган. Подрядчы — "Ак-Бата" ААК.
Ленин районунун Месарош көчөсүндөгү мамлекеттик архивдин жаңы имараты. Жалпы аянты 2,7 миң чарчы метрден ашкан беш кабаттуу имарат толук пайдаланууга берилди. Курулуш өз убагында бүткөрүлгөн. Подрядчы — "УКС" ЖЧКсы.
Көлмө конушунда заманбап китепкана ачылды. Аянты 600 чарчы метрден ашкан үч кабаттуу имарат жергиликтүү бюджеттин эсебинен курулган. Курулуш иштери 100% бүткөрүлдү. Подрядчы — "Сапат Пром" ЖЧКсы.
Бишкек шаарындагы №1 мектеп-интернатынын аймагына кошумча спорт зал куруу. Имарат жертөлөсү менен бир кабаттуу. Ичинде спорт залы, машыктыруучу жана медициналык кабинеттер, кийим чечүүчү бөлмөлөр жана санитардык жайлар каралган. Подрядчы — «Баасыз Курулуш» ЖЧКсы.
Жукеев-Пудовкин көчөсү, 41а дарегинде жайгашкан оор атлетика боюнча балдар-өспүрүмдөрдүн адистештирилген олимпиадалык резерв мектебинин жаңы заманбап залынын ачылышы өттү. Бул спорт объектиси өзүнчө кийим алмаштыруучу жайлар, душ жана дааратканалар, көрүүчүлөр үчүн трибуналар, машыктыруучулар жана персонал үчүн кабинеттер, заманбап желдетүү жана жарыктандыруу системасы, машыгуу жана мелдештер үчүн профессионалдык жабдуулар, ошондой эле турнирлерди байкоого ылайыкталган балкон менен жабдылган.
Мындан тышкары, №54 мектепке кошумча корпустун ачылышы да болду. Аталган имараттын курулушу 2019-жылы башталып, башында 350 окуучуга ылайыкталган. Бирок учурдун талабына ылайык кеңейтилди.
Жаңы окуу жылынан баштап бул имаратта 8-11-класстарда 700 окуучу билим алат. Алар менен 78 мугалим иштейт.
