Бишкек шаарынын мэри Илияс Колопов жана Тажикстандын Душанбе шаарынын мэриясынын аппарат жетекчиси Курбонализода Нурулло Шамсулло жолугушуп, муниципалдык башкарууну санариптештирүү боюнча кызматташуу мүмкүнчүлүктөрүн талкуулашты.

"Санариптик технологияларды өнүктүрүү биздин ишибиздин негизги артыкчылыктарынын бири. Бишкек менен Душанбе шаарларынын ортосундагы тажрыйба алмашуу кызматташтыкты чыңдоого, жаңы чечимдерди табууга жана жарандарыбызга көрсөтүлүүчү кызматтардын сапатын жогорулатууга мүмкүндүк берет деп ишенебиз", - деп белгиледи Илияс Колопов.

Мэриянын "Санариптик технологиялар борбору" муниципалдык ишканасынын жетекчисинин  орун басары Чыңгыз Жумагулов шаардагы ар түрдүү тармактарда санариптештирүү боюнча жүргүзүлүп жаткан иштер тууралуу маалымат берди.

«Душанбе Бишкектин жетишкендиктерин жогору баалайт жана жигердүү тажрыйба алмашууга, транспорт, экология, санариптештирүү, маданият жана билим берүү тармактарында биргелешкен долбоорлорду ишке ашырууга кызыкдар», - деп кошумчалады Нурулло Курбонализода.

Жолугушуунун жыйынтыгында тараптар санариптештирүү жаатында кызматташууга макулдашышты.