Борбор калаада Кыргыз Республикасынын Министрлер Кабинетинин Төрагасы жана Президенттик администрациянын башчысы Адылбек Касымалиевдин төрагалыгы алдында Бишкек шаарынын мэриясынын 2025-жылдагы муниципалитеттин ишмердүүлүгүнүн жыйынтыгы жана 2026-жылга пландары боюнча коллегиясынын жыйыны болуп өттү.

Бишкек шаарынын мэри Айбек Джунушалиев жол транспортунун инфратүзүмүн өнүктүрүү пландары жөнүндө айтып берди.

2026-жылы 119 километр жолдорду жана көпүрөлөрдү куруу жана реконструкциялоо пландаштырылууда, анын ичинде:
* 19 км жаңы жолдор;
* 100 км реконструкциялоо;
* 6 жаңы көпүрө куруу;
* жергиликтүү бюджеттин эсебинен 1 жол түйүнүн куруу.

Ошондой эле 28 км тротуарларды, 20 жер астындагы жөө жүргүнчүлөр өтүүчү өтмөктөрдү жана 3 жер үстүндөгү жөө жүргүнчүлөр өтүүчү өтмөктөрдү куруу пландаштырылууда.

Белгилей кетүүчү нерсе, 2025-жылы борбор калаада 92 км жол оңдолгон, ал эми 2024-жылы бул көрсөткүч 62 км болсо, 2023-жылга чейинки мезгилде жылына орточо эсеп менен 17 км гана курулган. Ошентип, мурунку жылдарга салыштырмалуу 2025-жылы жол курулушунун көлөмү беш эсеге өскөн.

Мэр жол курулушуна болгон мамиле өзгөргөнүн баса белгиледи: алгач коммуналдык тармактарды алмаштыруу, андан кийин жол куруу жана капиталдык оңдоо иштери жүргүзүлөт.

Ошондой эле көп кабаттуу унаа токтотуучу жайларды куруу долбоору каралууда.