Бишкекте «Жаш таланттар» аттуу шаардык сынактын «Ансамблдер» номинациясы өттү. Иш-чара Бишкек шаарынын мэриясынын Маданият башкармалыгы тарабынан уюштурулуп, шаардагы балдар искусство мектептеринин окуучуларын чогултту.

Сынактын алкагында жаш музыканттар ар түрдүү багыттар боюнча өз өнөрлөрүн көрсөтүштү. Алардын катарына фортепиано ансамблдери, камералык ансамблдер (кыл аспаптар, үйлөмө жана урма аспаптар фортепиано менен), ошондой эле аспаптык ансамблдер кирди. Катышуучулар жогорку деңгээлдеги аткаруучулук чеберчилигин, сахналык маданиятын жана чыгармачылык мүмкүнчүлүктөрүн көрсөтүштү.

Сынактык угуу Д. Назарматов атындагы №9 Балдар искусство мектебинин концерттик залында өттү.  Сахнага ар кандай жаш курактагы ондогон ансамблдер чыгышты — дуэттерден тартып, көп сандуу аткаруучулардан турган жамааттарга чейин.

Бул сынакты өткөрүүнүн негизги максаты — таланттуу балдарды аныктоо жана колдоо, алардын чыгармачылык жөндөмдөрүн өнүктүрүү, ошондой эле өсүп келе жаткан муун арасында академиялык музыкалык искусствону жайылтуу болуп саналат.

Сынактын жыйынтыгы 18-апрелде өтө турган гала-концертте жарыяланып, анда жеңүүчүлөр сыйланып, мыкты катышуучулар өз өнөрлөрүн көрсөтүшөт.

«Жаш таланттар» шаардык сынагы салттуу түрдө Бишкектин маданий жашоосунда маанилүү окуя болуп эсептелет жана көркөм билим берүүнү өнүктүрүүгө, ошондой эле жаш таланттарды колдоого чоң салым кошот.