2026-жылдын 16-апрелинде «Балдарды коргоо системасы: көйгөйлөрдөн чечимдерге бирге» аттуу тегерек стол болуп өттү. Иш-чараны «SOS Балдар айылдары Кыргызстан» коомдук фонду уюштурду.
Жолугушууга Бишкек шаарынын мэринин социалдык маселелер боюнча орун басары Виктория Мозгачева, район башчыларынын орун басарлары, Социалдык өнүктүрүү департаментинин өкүлдөрү, эксперттер жана жарандык коомдун өкүлдөрү катышты.
Жолугушуунун жүрүшүндө социалдык жетимдиктин алдын алуу, камкордуктун альтернативдүү түрлөрүн өнүктүрүү, ошондой эле мамлекеттик органдар менен бейөкмөт сектордун ортосундагы ведомстволор аралык өз ара аракеттенүүнү өркүндөтүү маселелери талкууланды. Өзгөчө көңүл балдарды интернаттык мекемелерге негизсиз жайгаштыруунун алдын алууга жана турмуштук оор кырдаалда турган үй-бүлөлөргө өз убагында колдоо көрсөтүүгө багытталган гейткипинг инструменттерин киргизүүгө бурулду.
Катышуучулар балдардын укуктарын жана кызыкчылыктарын коргоодо туруктуу ыкманын маанилүүлүгүн, үй-бүлөлүк тарбия формаларын өнүктүрүүнү жана мамлекеттик органдар, жергиликтүү өз алдынча башкаруу органдары менен бейөкмөт уюмдардын ортосундагы кызматташууну чыңдоонун зарылдыгын белгилешти. Натыйжалуу өз ара аракеттенүү балдардын бакубаттуулугун жогорулатууга жана үй-бүлө институтун бекемдөөгө багытталган практикалык чечимдерди иштеп чыгууга өбөлгө түзөрү айтылды.
Бишкек шаарынын мэриясы балдардын укуктарын коргоо, үй-бүлөлүк көйгөйлөрдүн алдын алуу жана социалдык колдоо механизмдерин өркүндөтүү маселелерине артыкчылыктуу көңүл бурат. Муниципалитеттин мындай иш-чараларга катышуусу жарандык сектор менен өнөктөштүктү өнүктүрүүгө жана социалдык чөйрөдө натыйжалуу чечимдерди ишке киргизүүгө көмөк көрсөтөт.
Маалымат үчүн: «SOS Балдар айылдары Кыргызстан» коомдук фонду үй-бүлөнү колдоого жана үй-бүлөлүк тарбия формаларын өнүктүрүүгө багытталган программаларды ишке ашырып, ар бир баланын үй-бүлөлүк чөйрөдө жашоо жана тарбия алуу укугун камсыз кылууга салым кошот.
