2026-жылдын 24-апрелинде Бишкектин бириккен мемориалдык музейлеринин дирекциясынын курамындагы О.М. Мануйлованын мемориалдык үй-музейинде Кыргыз Республикасынын Сүрөтчүлөр союзунун мүчөсү, скульптор жана сүрөтчү Өмүрбек Каратаевдин жеке көргөзмөсүнүн ачылышы болду.

«qara» деп аталган көргөзмө Бишкек шаарынын күнүнө карата уюштурулган. Анда сүрөтчүнүн скульптура жана графика жанрларындагы 30га жакын чыгармасы көрсөтүлдү.

Бул долбоор сүрөтчүнүн беш жылдык чыгармачылык изилдөөсүнүн жана эксперименттеринин жыйынтыгы болуп саналат. Басма графика техникасында башталган «Рефлексия» сериясы аркылуу сүрөтчү форманы жөнөкөйлөтүүгө жана минималдуу каражаттар аркылуу издөөгө болгон умтулуусун көрсөтөт. Бул контекстте «qara» түшүнүгү жөн гана түс катары эмес, күчтүн, энергиянын жана тереңдиктин символу катары кызмат кылат.

Экспозиция автордун графикадан скульптурага өтүшүн чагылдырган, анда жеке тажрыйба жана философиялык ой жүгүртүү көрүүчүнү терең ой жүгүртүүгө үндөйт.

Өмүрбек Каратаев Тургунбай Садыков атындагы Кыргыз мамлекеттик көркөм сүрөт академиясынын скульптура бөлүмүн бүтүргөн. Анын эмгектери Бишкекте, Берлинде, Казанда, Варнеде жана Никосияда өткөн улуттук жана эл аралык көргөзмөлөрдө коюлган.

Сүрөтчүнүн эмгектери Түндүк Кипр заманбап искусство музейинин, "Чептүү шаар" шаардык музейинин жана Казандагы Татарстан Республикасынын Мамлекеттик көркөм сүрөт музейинин коллекцияларында бар.

Иш-чарага чыгармачыл интеллигенциянын өкүлдөрү, борбор калаанын тургундары жана коноктору, ошондой эле ЖМК өкүлдөрү катышты.