2026-жылдын 21-июнунда Жеңиш аянтында Улуу Ата Мекендик согуштун 85 жылдыгына карата «Эскерүү шамы» – «Согуштун оттуу сүрөттөрү» жана «Ысымдын кайтарылышы» эл аралык акциялары болуп өттү.
Иш-чарага Бишкек шаарынын мэринин орун басарынын милдетин убактылуу аткаруучу Рахат Мусаева, КР Жогорку Кеңешинин төрагасынын орун басары Болот Ибрагимов, КР Куралдуу Күчтөрүнүн, Коргоо министрлигинин өкүлдөрү, дипломатиялык корпус, коомдук уюмдардын мүчөлөрү, ардагерлер, ыктыярчылар, борбор калаанын тургундары жана коноктору катышты.
Рахат Мусаева өз сөзүндө тарыхты сактоону жана аны келечек муундарга өткөрүп берүүнүн маанилүүлүгүн баса белгиледи.
"Биздин милдет — энелерибиздин эмгегин жана аталарыбыздын каармандыгын келечек муундардын эсинде сактап калуу. Бүгүн Кыргызстанда жана Бишкекте жагылган шам — бул сый-урматтын, ыраазычылыктын символу. Жеңүүчүлөр муунунун эрдиги биздин жүрөгүбүздө түбөлүккө сакталат", — деп баса белгиледи мэрдин орун басары.
Программа Кыргызстандын белгилүү артисттеринин жана чыгармачыл жамааттарынын аткаруусундагы номерлер менен коштолду. Коноктор үчүн «Имена», «21 июня», «Журавли», «Баллада о военных лётчицах», «Не забывайте» жана «Эстелик» чыгармалары аткарылды. Ошондой эле Кыргызстандын эмгек сиңирген артисти Динара Абдыкадырованын аткаруусунда Чыңгыз Айтматовдун «Саманчынын жолу» повестинен Толгонайдын монологу тартууланды.
Бул жылдагы акциянын башкы темасы Улуу Ата Мекендик согуш жылдарындагы аялдардын эрдигине арналды. Бишкекте оттуу композиция Советтер Союзунун Баатыры Евдокия Паськонун эрдигине арналды. Ал эми Кыргызстандын аймактарында согуш мезгилиндеги аялдардын Жеңишке кошкон зор салымына урмат көрсөтүлдү.
«Ысымды кайтаруу» акциясынын алкагында мурда дайынсыз жоголгон деп эсептелген Казакстандын, Өзбекстандын жана Таджикстандын жарандары тууралуу архивдик документтер алардын жакындарына тапшырылды, алардын тагдыры көп жылдык издөө иштеринин натыйжасында аныкталган.
Иш-чараларды Кыргызстандын мамлекеттик жана коомдук уюмдарынын, ошондой эле эл аралык өнөктөштөрдүн колдоосу менен Кыргызстандын «Жеңиш ыктыярчылары» кыймылы, «Память народа – Эл Эстейт» издөө кыймылы жана Ленинград блокадачыларынын Кыргызстандагы коому уюштурду.
