2026-жылдын 5-августунда Бишкекте мэрдин орун басары Рамиз Алиевдин төрагалыгы алдында «Бишкек шаардык транспорту» муниципалдык ишканасынын жетекчилигинин жана каттам бригадирлеринин катышуусунда жыйын өттү.
Жыйындын негизги максаты муниципалдык коомдук транспорттун ишинин сапатын жогорулатуу, жүргүнчүлөрдү ташууда коопсуздукту камсыз кылуу, калкты тейлөө маданиятын, ошондой эле айдоочулардын эмгек шарттарын жакшыртуу боюнча актуалдуу маселелерди талкуулоо болду.
Жыйында жол кыймылынын коопсуздугун камсыз кылуу маселелерине өзгөчө көңүл бурулду. Мэрдин орун басары жол кыймылынын эрежелерин сактоо, өз милдеттерине жоопкерчилик менен мамиле кылуу жана жүргүнчүлөрдүн коопсуздугун камсыз кылуу ар бир айдоочу үчүн талашсыз артыкчылык бойдон калышы керектигин баса белгиледи. Ошондой эле жол-транспорт кырсыктарынын алдын алууну күчөтүү жана кыймылдуу курамдын тийиштүү техникалык абалын камсыз кылуу боюнча милдеттер коюлду.
Өзүнчө маселе катары айдоочулардын жүрүм-турум маданияты жана жүргүнчүлөрдү тейлөө сапаты каралды. Муниципалдык транспорттун айдоочусу шаардык кызматтын жүзү экени белгиленип, андыктан жүргүнчүлөргө карата сылык, адилеттүү жана кайрымдуу мамиле ар бир кызматкердин күнүмдүк ишинин ажырагыс бөлүгү болушу кажет.
Мындан тышкары, жыйындын катышуучуларына айдоочулардын эмгек акысы маселелери боюнча толук маалымат берилди. Ишкананын жетекчилиги тарабынан эмгек акыны чегерүүнүн тартиби, колдонуудагы эмгек акы төлөө шарттары жана кызматкерлерди материалдык жактан колдоону өнүктүрүү боюнча жүргүзүлүп жаткан иштер тууралуу түшүндүрмөлөр берилди.
Жыйындын жыйынтыгында каттам бригадирлерине айдоочулар арасында түшүндүрүү иштерин жүргүзүү, эмгек акыга тиешелүү маалыматты ар бир кызматкерге өз убагында жеткирүү, ошондой эле эмгек тартибин, жол кыймылынын коопсуздук талаптарын жана жүргүнчүлөрдү тейлөө стандарттарын сактоо боюнча көзөмөлдү күчөтүү тапшырылды.
