Бишкек шаарынын мэриясынын Дене тарбия жана спорт, туризм жана жаштар менен иштөө департаменти 2026-жылдын январь–август айларында өткөрүлгөн окуу-машыгуу жыйындарынын жыйынтыгын чыгарды.
Сегиз айдын ичинде Бишкек шаарындагы олимпиадалык резервдеги адистештирилген балдар-өспүрүмдөр спорт мектептери тарабынан 76 окуу-машыгуу жана ден соолукту чыңдоо жыйыны өткөрүлүп, ага спорттун ар кандай түрлөрү боюнча 1 739 тарбиялануучу катышты.
Жыйындар жыл ичинде Бишкек шаарындагы жана Кыргызстандын аймактарындагы спорттук-ден соолукту чыңдоочу базаларда, негизинен Ысык-Көлдүн жээгинде өткөрүлдү. Машыгуу процессин туура уюштурууга, жаш спортчулардын ден соолугун чыңдоого жана физикалык даярдыгын жогорулатууга өзгөчө көңүл бурулду.
Жыйындардын алкагында тарбиялануучулар үчүн атайын машыгуу сабактары, эртең мененки көнүгүүлөр, спорттук иш-чаралар, эстафеталар жана активдүү эс алуунун түрдүү формалары уюштурулду. Ошондой эле программага спортчулардын калыбына келишине жана командалык өз ара аракеттенүүнү чыңдоого багытталган ден соолукту чыңдоочу жана эс алуу иш-чаралары киргизилди.
Окуу-машыгуу жана ден соолукту чыңдоочу жыйындарды өткөрүү тарбиялануучуларга спорттук формасын сактоого, техникалык көндүмдөрүн жана физикалык сапаттарын өркүндөтүүгө, мелдештерге даярданууга, ошондой эле машыгуу процессин толук кандуу эс алуу жана калыбына келүү менен айкалыштырууга шарт түзөт.
