Бишкек шаарынын мэри Айбек Джунушалиев «Тазалык» муниципалдык ишканасына жаңы атайын техникаларды тапшыруу аземине катышты.

Ишканага 22 даана атайын техника тапшырылды. Алардын арасында 11 даана МАЗ үлгүсүндөгү таштанды ташуучу унаа, 1 даана «Шумкар» таштанды ташуучу унаасы, 5 даана «Хово», 1 даана «Дамас» жана 4 даана «Лабо» үлгүсүндөгү автоунаа бар.

Жаңы техникалар шаарды санитардык жактан тазалоо иштерин күчөтүүгө, тиричилик калдыктарын өз убагында чыгарууга жана муниципалдык ишкананын ишинин натыйжалуулугун жогорулатууга багытталган.

Мындан тышкары, Минск шаарынан дагы 3 даана атайын техника келиши күтүлүүдө. Жетишилген макулдашууларга ылайык, аларды 15-октябрга чейин жеткирүү пландалууда.

Жаңы техникаларды кошкондо, «Тазалык» муниципалдык ишканасынын карамагындагы атайын автотранспорттун жалпы саны 400дөн ашты.

Автопарктын жаңыланышы ишкананын материалдык-техникалык базасын чыңдоого, таштандыларды чыгаруунун ыкчамдуулугун жогорулатууга жана Бишкек шаарынын аймагын санитардык жактан тазалоо иштерин кыйла натыйжалуу жүргүзүүгө мүмкүндүк берет.