2026-жылдын 22-сентябрында Бишкек шаарынын Ленин районундагы Ак-Ордо конушунда жаңы Diaverum диализ борборунун расмий ачылыш аземи  өттү.

Борбор бөйрөк оорулары менен жабыркаган жана үзгүлтүксүз гемодиализ процедурасына муктаж бейтаптарга адистештирилген медициналык жардам көрсөтүүгө арналган.

Мамлекеттик заказдын алкагында белгиленген талаптарга жооп берген бейтаптар үчүн диализ кызматтары акысыз көрсөтүлөт.

Долбоор Кыргыз Республикасынын мамлекеттик сектору, швециялык Diaverum медициналык компаниясы жана Бириккен Араб Эмираттарынан келген M42 инвестициялык компаниясынын биргелешкен инвестициялык демилгесинин алкагында ишке ашырылды.

Жаңы борбордун ачылышы Ак-Ордо, Ак-Өргө, Ала-Тоо жана ЖЭБ-2 конуштарынын тургундары үчүн зарыл болгон медициналык жардамдын жеткиликтүүлүгүн жогорулатат. Эми аталган аймактарда жашаган бейтаптар керектүү дарылануудан өтүү үчүн Бишкектин борбордук бөлүгүнө үзгүлтүксүз каттап барууга муктаж болбойт.

Борбор заманбап медициналык жабдуулар менен камсыздалып, ишин 15 диализдик орун менен баштады. Келечекте борбордун кубаттуулугун 20 орунга чейин көбөйтүү каралган.

Конуштардагы медициналык инфраструктураны өнүктүрүү адистештирилген медициналык жардамды калк үчүн дагы да жеткиликтүү кылууга жана зарыл болгон дарыланууну жашаган жерине жакын алууга шарт түзөт.