26-сентябрда Бишкек шаарында Россиянын илим жана маданият борборунун 15 жылдыгына арналган «День Русского дома» аттуу майрамдык иш-чара өттү.

Майрамдык программа Эркиндик бульварында жана “Русский дом” имаратында уюштурулду. Борбор калаанын тургундары жана меймандары үчүн концерттер, көргөзмөлөр, адабий жолугушуулар, интеллектуалдык оюндар жана билим берүү иш-чаралары өткөрүлдү.

Иш-чаранын алкагында Орус үйүнүн Москвадагы Л. Н. Толстой музейи менен биргеликте даярдаган «Чыңгыз Айтматов жана Лев Толстой: гуманист жазуучулардын диалогу» аттуу көргөзмөсү ачылды.

Ошондой эле мектеп окуучулары жана жаштар үчүн Орусиянын жогорку окуу жайларынын бүтүрүүчүлөрү менен жолугушуулар, билим алуу мүмкүнчүлүктөрүнүн презентациялары, адабий жана тарыхый клубдардын жыйындары, викториналар жана Эл аралык жаштар фестивалынын катышуучулары менен жолугушуулар уюштурулду.

Майрамдык программада чыгармачыл топтор, «Сувенир» орус ырларынын ансамбли, «META TEAM» хору жана «Вуд Хеликоптер» рок-тобу өнөр көрсөтүштү.

Россотрудничествонун Кыргызстандагы өкүлчүлүгүнүн жетекчиси Альберт Зульхарнеевдин айтымында, иш-чаранын жүрүшүндө келгендер Русский домдун маданий, билим берүү, илимий жана жаштарга багытталган долбоорлору менен кеңири таанышууга мүмкүнчүлүк алышты.

Иш-чара маданий жана билим берүү тармагындагы тажрыйба алмашуу үчүн аянтча болуп, борбор калаанын тургундарына мүмкүнчүлүктөрү менен таанышууга шарт түздү.