Октябрь районунда кошумча социалдык колдоого муктаж болгон үй-бүлөлөргө мамлекеттик колдоо көрсөтүү боюнча иштер социалдык контракт программасынын алкагында уланууда.

Программанын алкагында үй-бүлөлөргө 150 000 сом өлчөмүндө социалдык жардам көрсөтүлөт. Бул каражатты программанын талаптарына ылайык белгиленген багыттар боюнча өзүнүн жеке долбоорун ишке ашырууга жумшоого болот.

2026-жылдын 28-сентябрында программанын катышуучуларынын арыздарын жана долбоорлорун кароо боюнча комиссиянын отуруму болуп өттү. Бүгүнкү күнгө чейин комиссия тарабынан 14 арыз каралып, анын ичинен 5 үй-бүлөнүн долбоору жактырылды.

Жактырылган долбоорлордун арасында тигүүчүлүк иш, кондитердик азыктарды өндүрүү жана репетитордук кызмат көрсөтүү багытындагы демилгелер бар. Көрсөтүлгөн колдоо катышуучуларга керектүү материалдарды жана жабдууларды сатып алууга, ошондой эле өз ишин баштоого же кеңейтүүгө мүмкүнчүлүк берет.

2026-жылга Октябрь району үчүн программага 15 үй-бүлөнүн катышуусуна квота каралган.

Райондо программага катышууга кызыкдар болгон үй-бүлөлөр арасында маалыматтык-түшүндүрүү иштери да улантылууда. Жашоочуларга программага катышуунун шарттары, талапкерлерге коюлуучу талаптар жана өз долбоорлорун ишке ашыруу мүмкүнчүлүктөрү тууралуу маалымат берилүүдө.

Бул иштер социалдык контракттын алкагында колдоо алган үй-бүлөлөргө берилген мүмкүнчүлүктөрдү өз ишин өнүктүрүүгө, туруктуу киреше булагын түзүүгө жана өз алдынчалыгын жогорулатууга натыйжалуу пайдаланууга багытталган.