2026-жылдын 21-сентябрынан 29-сентябрына чейин «Бишкек ЖЭБ» муниципалдык ишканасынын окуу класстарында өндүрүштүк цехтердин кызматкерлери «Стропальщиктер» программасы боюнча окуудан өтүштү.

56 саатка созулган окуу өнөр жай коопсуздугу жаатындагы ченемдик документтердин талаптарына ылайык өткөрүлдү. Окуу программасы теориялык жана практикалык даярдыкты камтыды.

Теориялык бөлүктүн алкагында кызматкерлер өнөр жай коопсуздугунун талаптарын, эмгекти коргоо жана коопсуздук техникасынын негиздерин, жүк көтөрүүчү механизмдердин өзгөчөлүктөрүн, жүк кармоочу түзүлүштөрдүн жана идиштердин түрлөрүн, жүктөрдү строптоо ыкмаларын, ошондой эле жүк көтөрүүчү механизмдер менен иштөөдө коопсуздук талаптарын үйрөнүштү.

Теориялык даярдыктан өткөндөн кийин кызматкерлер түздөн-түз жумуш орундарында өндүрүштүк окуудан өтүп, алган билимдерин жана практикалык көндүмдөрүн бекемдешти.

Окутуунун жыйынтыктоочу этабы квалификациялык экзамен болду. Экзаменди ийгиликтүү тапшырган кызматкерлерге стропальщик квалификациясы ыйгарылып, жүк көтөрүүчү механизмдер менен иштерди аткарууга укук берген күбөлүктөр тапшырылды.

Адистештирилген окууну өткөрүү кызматкерлердин кесиптик даярдыгын жогорулатууга жана «Бишкек ЖЭБ» муниципалдык ишканасында өндүрүштүк иштердин коопсуз аткарылышын камсыз кылууга багытталган.