Бишкек шаарындагы №101 орто мектепте КРнын Балдар укугу  боюнча ыйгарым укуктуу өкүлчүлүгүнүн катчылыгы Балдарды коргоо борбору менен биргеликте уюштурган балдарга карата зордук-зомбулуктун алдын алуу боюнча маалымат кербени башталды.

Иш-чарага Бишкек шаарынын мэринин орун басары  В.А. Мозгачева жана Кыргыз Республикасынын Балдардын укуктары боюнча ыйгарым укуктуу өкүлү А.Р. Чынбаева катышты.

Пландалган иш-чаралардын максаты — үй-бүлөдөгү жана билим берүү чөйрөсүндөгү жакшы тарбиянын негизинде балдардын өзүн инсан катары урматтоого, ошондой эле айланасындагы адамдарга сый-урмат менен мамиле кылууга негизделген активдүү жарандык позициясын калыптандыруу болуп саналат. Бул иш-чаралар БУУнун Бала укуктары боюнча комитетинин балдарга карата зомбулукка жол берилбеши тууралуу акыркы сунуштамаларын аткаруу боюнча Иш-пландын алкагында ишке ашырылууда.

Бишкек шаарынын мэринин орун басары  В.А. Мозгачева сөз сүйлөп,  балдар, мугалимдер жана ата-энелер менен коопсуз жана ишенимдүү мектеп чөйрөсүн түзүүгө багытталган профилактикалык иштердин маанилүүлүгүн белгиледи.

Иш-чарада бир нече темалар боюнча интерактивдүү сессиялар өткөрүлдү:

•«Позитивдүү ата-эне болуу» — коопсуз чөйрөнү түзүүдө үй-бүлөнүн ролу жана зомбулуксуз тарбиялоо ыкмалары;

•«Кесипке багыт берүү» — келечекте керек болгон жөндөмдөрдү жана сапаттарды өнүктүрүү;

* «Эмоционалдык интеллект» — мугалимдер үчүн, буллингдин белгилерин таанып-билүүгө басым жасоо менен;

* «Кахут оюну» — окуучулар үчүн, кыска метраждуу тасмалар жана балдардын укуктары боюнча викторина.

Кербен жалпы талкуу, топтук иштердин бет ачары жана сынактын жеңүүчүлөрүн сыйлоо аземи менен жыйынтыкталды.