Бишкек шаарынын мэриясынын 

Шаардык чарба департаменти жөнүндө

ЖОБО

1. Жалпы жоболор

1. Ушул жобо Бишкек шаарынын мэриясынын Шаардык чарба департаментинин (мындан ары – Департамент) иш-аракетинин укуктук жана уюштуруучулук негиздерин аныктайт.
2. Департаменттин уюштуруучусу болуп Бишкек шаарынын мэриясы эсептелет. Департаменттин уюштуруу документи болуп ушул Жобо эсептелет.

3.Департамент турак жай-коммуналдык чарба объекттеринин туруктуу жана коопсуз иштешин камсыз кылуу, Бишкек шаарын Бишкек шаарынын калкына көрсөтүлүүчү коммуналдык кызматтардын жана товарлардын сапатын жогорулатуу үчүн шарттарды түзүү чөйрөсүндө бирдиктүү шаардык саясатты жана башкарууну, ошондой эле айлана-чөйрөнү коргоо жана экология жаатында координациялоону жүзөгө ашыруучу Бишкек шаарынын мэриясынын ведомстволук бөлүмү болуп саналат.

4.Департамент мекеме - уюштуруу-укуктук формадагы юридикалык жак болуп саналат, өз алдынча баланска, банк мекемелеринде эсептерге жана бюджеттик эсептешүү эсебине, казыналык органдарында (Бишкек шаары боюнча казыначылыктын регионалдык бөлүмү) депозиттик эсепке, Кыргыз Республикасынын Мамлекеттик гербинин сүрөтү бар мамлекеттик жана расмий тилдерде өзүнүн аталышы менен тегерек мөөргө, фирмалык бланктарга, штампка жана башка реквизиттерге жана расмий атрибуттарга ээ, сотто доогер жана жоопкер болуп чыгууга укуктуу.

5.Департамент өз ыйгарым укуктарынын алкагында, Бишкек шаарынын мэриясынын кызыкчылыктарын көрсөтөт жана Кыргыз Республикасынын Конституциясына, Кыргыз Республикасынын башка ченемдик укуктук актыларына, Кыргыз Республикасынын мыйзамдарына ылайык күчүнө кирген эл аралык келишимдерге, Бишкек шаарынын жергиликтүү өз алдынча башкаруусунун өкүлчүлүктүү органынын ченемдик укуктук актыларына, Бишкек шаарынын мэриясынын чечимдерине, ошондой эле ушул Жобого ылайык аракеттенет.

6.Департамент өз иш-аракеттерин Кыргыз Республикасынын мамлекеттик органдары, жергиликтүү өз алдынча башкаруу органдары, ошондой эле башка юридикалык жана жеке жактар менен өз ара аракеттенүү менен жүзөгө ашырат.

7.Департаменттин мамлекеттик жана башка органдар, ошондой эле менчигинин түрүнө карабастан юридикалык жана жеке жактар менен өз ара мамилелери Кыргыз Республикасынын мыйзамдарына ылайык жүзөгө ашырылат.

8.Департаменттин толук расмий аталышы:

-мамлекеттик тилде: «Бишкек шаарынын мэриясынын Шаардык чарба департаменти» муниципалдык мекемеси;

-расмий тилде: муниципальное учереждение «Департамент городского хозяйства мэрии города Бишкек».

Департаменттин  кыскартылган фирмалык аталышы:

-мамлекеттик тилде: «ШЧД»;

-расмий тилде: «ДГХ».

9.Департаменттин юридикалык дареги: 720028, Кыргыз Республикасы, Бишкек шаары, Жукеев-Пудовкин көчөсү, 150.

2. Департаменттин максаты жана милдеттери

10.Департаменттин максаты турак жай-коммуналдык чарба объекттеринин иштешин камсыздоо, көрктөндүрүү, Бишкек шаарынын калкына көрсөтүлүүчү коммуналдык кызматтардын жана товарлардын сапатын жогорулатуу үчүн шарттарды түзүү чөйрөсүндө, ошондой эле айлана-чөйрөнү коргоо жана экология жаатында координациялоочу Бишкек шаарынын мэриясынын ыйгарым укуктарын жүзөгө ашыруу болуп саналат.

11.Департаменттин негизги милдеттери болуп төмөнкүлөр саналат:

-Бишкек шаарынын мэриясынын ведомстволук, аймактык бөлүмдөрүнүн жана муниципалдык ишканаларынын коммуналдык чарбанын, суу жабдуу, суу агызып чыгаруу тармактарынын, көрктөндүрүү, жашылдандыруу объекттеринин натыйжалуу иштешин жана өнүгүшүн камсыздоо боюнча, ошондой эле санитардык тазалоо жана катуу тиричилик калдыктарын иштетүү боюнча иш-аракеттерди, ошондой эле айлана-чөйрөнү коргоо жана экология жаатын координациялоо;

-Кыргыз Республикасынын мыйзамдарына ылайык башкаруу формасына жана менчигинин түрүнө карабастан уюмдар жана ишканалар тарабынан Бишкек шаарынын калкына коммуналдык кызмат көрсөтүүлөрдү жана товарларды берүүнү уюштуруу;

-коммуналдык кызматтарды көрсөтүүлөрдү жана товарларды берүүдө атаандаштык чөйрөнү өнүктүрүү, коммуналдык чарба чөйрөсүндө башкаруунун жана чарба жүргүзүүнүн рыноктук формасын киргизүүгө көмөк көрсөтүү;

-турак жай-коммуналдык чарба чөйрөсүндөгү муниципалдык ишканалардын натыйжалуу иш-аракеттерин уюштуруу;

-шаардын туруктуу экологиялык системасын тзүү.

3. Департаменттин негизги функциялары

1. Департамент өзүнө жүктөлгөн милдеттерди аткаруу максатында төмөнкү функцияларды жүзөгө ашырат:
   • турак жай-коммуналдык чарба, айлана-чөйрөнү коргоо жана экология жаатында бирдиктүү шаардык саясатты түзүү боюнча сунуштарды иштеп чыгуу жана Бишкек шаарынын мэриясынын кароосуна киргизүү;
   • жетектеген багыттары боюнча Бишкек шаарынын мэриясынын ченемдик укуктук актыларынын жана чечимдеринин долбоорлорун иштеп чыгуу, аларды Бишкек шаарынын мэриясынын кароосуна киргизүү;
   • коммуналдык чарба, айлана-чөйрөнү коргоо жана экология чөйрөсүндө концепциялардын, стратегиялардын, программалардын, иш-чаралардын пландарынын долбоорлорун, жетектеген муниципалдык ишканаларды өнүктүрүүнүн келечектүү программаларын иштеп чыгуу, белгиленген тартипте бекитилгенден кийин алардын аткарылышын уюштуруу;
   • жетектеген муниципалдык ишканаларда бирдиктүү финансы-экономикалык, тарифтик, баа, эсепке алуу жана социалдык саясатты түзүүгө көмөк көрсөтүү;
   • Департаменттин иш-аракеттеринин багыттары боюнча кезектеги финансылык жылга жана пландык мезгилге Бишкек шаарынын бюджетин түзүүгө катышуу;
   • жетектеген муниципалдык ишканалардын тиешелүү чыгашаларын пландаштыруу, бюджеттик ассигнованиелер боюнча негиздемелерди жана эсептешүүлөрдү даярдоо;
   • Кыргыз Республикасынын мыйзамдары тарабынан белгиленген бюджеттик ыйгарым укуктарды жүзөгө ашыруу;
   • жетектеген муниципалдык ишканалардын финансылык-чарбалык пландарын, ошондой эле алардын финансылык-чарбалык иш-аракеттеринин натыйжалуулугун жогорулатуу боюнча иш-чараларды кароо жана бекитүү;
   • жетектеген муниципалдык ишканалардын финансылык-чарбалык иш-аракеттеринин жыйынтыктарынын натыйжалуулугуна экономикалык талдоо жүргүзүү;
   • жетектеген муниципалдык ишканалардын өндүрүштүк программаларын бекитүү;
   • жетектеген муниципалдык ишканалардын бааларды жана тарифтерди белгилөө же өзгөртүү жөнүндө сунуштарын кароо, өз компетенциясынын чегинде бааларды жана тарифтерди белгилөөнүн жана өзгөртүүнүн максатка ылайыктуулугу жөнүндө корутундуларды белгиленген тартипте даярдоо;
   • коммуналдык чарба чөйрөсүндөгү инвестициялык долбоорлордун ишке ашырылышын контролдоо;
   • Бишкек шаарынын административдик райондору боюнча муниципалдык тапшырыктын аткарылышы жөнүндө маалыматты жыйноо, талдоо, мониторинг жүргүзүү жана жалпылоо;
   • калкка жана чарба жүргүзүүчү субъекттерге коммуналдык чарба жаатында методологиялык жана консультациялык жардам көрсөтүү;
   • мамлекеттик, коомдук жана башка органдарда жетектеген муниципалдык ишканалардын кызыкчылыктарын коргоо;
   • коммуналдык чарбанын жана жашоо-тиричиликти камсыздоо  системасынын абалын талдоо, аларды андан ары өнүктүрүү, коммуналдык чарбанын иш-аракеттеринин натыйжалуулугун жогорулатуу боюнча чечимдерди кабыл алуу үчүн сунуштарды даярдоо;
   • турак жай фондун, көп батирлүү үйлөрдүн жалпы мүлкүн талаптагыдай күтүүгө жана сактоого багытталган иштерди координациялоо;
   • администрациялык райондор боюнча Бишкек шаарынын мэриясынын муниципалдык администрациялары менен бирдикте көп батирлүү үйлөрдү көп батирлүү үйдүн жалпы мүлкүн башкаруу формаларына: турак жай менчик ээлеринин шериктигине, турак жай жана турак жай-эксплуатациялык кооперативдерге которууга көмөк көрсөтүү, ошондой эле аларга усулдук жана консультациялык жардам көрсөтүү; 
   • көп батирлүү үйлөрдүн жалпы мүлкүнө аяр мамиле жасоого үйрөтүү максатында калк арасында маалыматтык-түшүндүрүү иштерин жүргүзүү;
   • коммуналдык чарба чөйрөсүнө жаңы технологияларды киргизүү;
   • коммуналдык кызмат көрсөтүүлөрдү жана товарларды берүүчүлөрдүн, Бишкек шаарынын калкынын жана жергиликтүү өз алдынча башкаруу органдарынын кызыкчылыктарын эске алган бирдиктүү тарифтик саясатты жүргүзүүгө жана баа түзүүгө көмөк көрсөтүү;
   • коммуналдык чарба чөйрөсүндөгү ишканаларга, уюмдарга тармакты өнүктүрүү боюнча инвестициялык программаларды иштеп чыгууда жана ишке ашырууда, Бишкек шаарынын аймагында, жалпы республиканын аймагында жана анын чегинен тышкары өз ара өнөктөштүк байланыштарды түзүүдө көмөк көрсөтүү;
   • коммуналдык кызмат көрсөтүүлөрдү жана товарларды берүүчүлөр менен керектөөчүлөрдүн ортосундагы укуктук мамилелерди өркүндөтүүгө жана системалаштырууга көмөк көрсөтүү;
   • Бишкек шаарынын аймагында катуу тиричилик калдыктарын чогултууну, ташып чыгарууну жана утилдештирүүнү уюштуруу боюнча иштерди координациялоо;
   • Бишкек шаарында айлана-чөйрөнү коргоо боюнча иш-чараларды координациялоо;
   • айлана-чөйрөнү коргоо жана экология чөйрөсүндө мамлекеттик органдар, эл аралык уюмдар жана коомдук бирикмелер менен өз ара аракеттенет.

4. Департаменттин  укуктары жана милдеттери

13.Департамент төмөнкүлөргө укуктуу:

-оперативдүү башкаруу укугунда мүлккө ээ болууга, өз иш-аракеттеринин максаттарына жана мүлктүн багытына ылайык аларга ээлик кылууга жана пайдаланууга;

-Департаменттин компетенциясынын чегинде Бишкек шаарынын муниципалдык мүлкүн тескөөгө, Кыргыз Республикасынын мыйзамдарына ылайык Бишкек шаарынын муниципалдык мүлкүнө карата келишимдерди, контракттарды жана башка бүтүмдөрдү түзүүгө; 

-Департаментке ишенип берилген мүлктү камсыздандыруу коргоосун жүзөгө ашырууга багытталган иш-чараларды ишке ашырууга;

-сот органдарында Бишкек шаарынын мэриясынын кызыкчылыктарын көздөөгө, ошондой эле өзүнүн компетенциясынын чегинде Кыргыз Республикасынын сот органдарына доолорду, анын ичинде Кыргыз Республикасынын мыйзамдарын бузуунун натыйжасында келтирилген зыянды өндүрүү жөнүндө доолорду берүүгө; 

-Кыргыз Республикасынын мыйзамдарына ылайык Департаменттин иш-аракеттерин камсыздоого багытталган келишимдерди, контракттарды, макулдашууларды түзүүгө;

-Департаменттин иш-аракетинин ченемдик укуктук базасын өркүндөтүү боюнча сунуштарды Бишкек шаарынын мэриясынын кароосуна киргизүүгө;

-Департаменттин компетенциясына кирген маселелер боюнча комиссиялардын, атайын жумушчу топтордун ишине катышууга;

-Департаменттин компетенциясынын маселелери боюнча жарандарды кабыл алууга, келип түшкөн сунуштарды, арыздарды жана даттанууларды кароого, алар боюнча зарыл чараларды көрүүгө;

-Департаменттин компетенциясынын чегинде буйруктарды чыгарууга;

–Кыргыз Республикасынын ченемдик укуктук актылары тарабынан каралган башка укуктарды жүзөгө ашырууга.

14.Департамент төмөнкүлөргө милдеттүү:

-Департаменттин кызматкерлерин коопсуз эмгек шарттары менен камсыздоого жана алардын ден соолугуна жана эмгекке жөндөмдүүлүгүнө келтирилген зыян үчүн жоопкерчилик тартууга;

-Департаменттин кызматкерлерин социалдык, медициналык жана милдеттүү камсыздандыруунун башка түрлөрү менен камсыздоого;

-Кыргыз Республикасынын мыйзамдарына ылайык мамлекеттик сырларды жана жашыруун маалыматтарды коргоону камсыздоого;

-Департаментке оперативдүү башкаруу укугунда берилген мүлктүн сакталышын камсыздоого;

-башка милдеттерди белгиленген тартипте аткарууга.

5. Департаменттин иш-аракетин уюштуруу

1. Департаменттин уюштуруучусу жана жогорку башкаруу органы болуп Бишкек шаарынын мэриясы саналат, ал мыйзамдарга ылайык Департаментти түзүү, кайра уюштуруу жана жоюу маселелерин чечет, Департаменттин жобосун, түзүмүн жана штаттык ырааттамасын бекитет.
2. Бишкек шаарынын мэриясы Департаменттин иш-аракетине тиешелүү бардык маселелер боюнча чечим кабыл алууга укуктуу.
3.  Департаменттин жетекчиси болуп мамлекеттик жарандык кызмат жана муниципалдык кызмат жөнүндө мыйзамдарга ылайык Бишкек шаарынын мэри тарабынан кызмат ордуна дайындалуучу жана кызмат ордунан бошотулуучу директор эсептелет.
4. Департаменттин директору:
   • Департаменттин иш-аракетин уюштурат жана жетектейт;
   • Департаментке жүктөлгөн милдеттерди аткаруу үчүн жеке жоопкерчилик тартат;
   • белгиленген штаттык сандын чегинде Департаменттин штаттык ырааттамасын жана иш регламентин Бишкек шаарынын мэриясына бекитүүгө берет;
   • эмгек мыйзамдарына жана мамлекеттик жарандык кызмат жана муниципалдык кызмат жөнүндө мыйзамдарга, штаттык ырааттамага ылайык Департаменттин кызматкерлерин кызмат ордуна дайындайт жана кызмат ордунан бошотот;
   • Бишкек шаарынын жергиликтүү өз алдынча башкаруу органдары, Кыргыз Республикасынын мамлекеттик органдары, эл аралык уюмдар, Кыргыз Республикасынын жана чет мамлекеттердин юридикалык жана жеке жактары менен өз ара мамилелерде Департаменттин атынан чыгат;
   • Департаменттин атынан ишеним катсыз жарандык-укуктук бүтүмдөрдү түзөт;
   • Департаменттин кызматкерлеринин кызматтык милдеттерин жана башка ички документтерин бекитет;
   • өз ыйгарым укуктарынын чегинде Департаменттин мүлкүн, анын ичинде акча каражаттарын башкарат;
   • Департаменттин кызматкерлери аткарууга милдеттүү болгон буйруктарды чыгарат;
   • Кыргыз Республикасынын мыйзамдарына ылайык Департаменттин кызматкерлерин сыйлоо жана жазалоо чараларын көрөт;
   • Кыргыз Республикасынын мыйзамдарына ылайык өндүрүштүк зарылчылыкты эске алуу менен Департаменттин иш режимин белгилейт;
   • өз орун басарынын компетенциясын аныктайт;
   • банктарда эсептерди ачат жана жабат, алар боюнча операцияларды жүргүзөт, финансылык документтерге кол тамга коёт; Кыргыз Республикасынын мыйзамдарына ылайык финансылык жана эсепке алуу тартибинин сакталышын камсыздайт.

1.  Департаменттин штатында директордун орун басары кызмат орду каралган.

Директордун орун басары мамлекеттик жарандык кызмат жана муниципалдык кызмат жөнүндө мыйзамдар тарабынан белгиленген тартипте Бишкек шаарынын мэри тарабынан кызмат ордуна дайындалат жана кызмат ордунан бошотулат.

Департаменттин директору иште жок болгон учурда (убактылуу эмгекке жарамсыздык, кызматтык иш сапары же өргүү) же ыйгарым укуктары токтотулган учурда, анын ыйгарым укуктарын директордун орун басары убактылуу жүзөгө ашырат.

Департаменттин финансылык документтерине кол тамга коюу укугу Департаменттин директорунун тийиштүү буйругунун же Бишкек шаарынын мэриясынын тескемесинин негизинде директордун орун басарына берилет.

Директордун орун басары белгиленген функционалдык милдеттерде аныкталган ыйгарым укуктардын жана Департаменттин директорунун буйруктарынын алкагында иш жүргүзөт.

1.  Департаменттин түзүмдүк бөлүмдөрүнүн кызматкерлери Департаменттин директору тарабынан берилген ишеним каттардын негизинде жана ушул Жобо, Департаменттин директорунун буйруктары жана кызматтык нускамалар тарабынан белгиленген ыйгарым укуктардын алкагында үчүнчү жактардын алдында Департаменттин атынан иш жүргүзүшөт.

6. Департаменттин мүлкү

1. Департаменттин мүлкүн ага оперативдүү башкаруу укугунда бекитилген, анын өз алдынча балансында көрсөтүлгөн негизги жана жүгүртмө каражаттар, финансылык ресурстар түзөт.

Департамент ага бекитип берилген мүлктү (негизги каражаттарды) Бишкек шаарынын мэриясынын макулдугу менен гана тескөөгө укуктуу.

1. Департаментти күтүүгө карата чыгашаларды каржылоо Бишкек шаарынын мэриясы тарабынан бекитилген чыгашалар сметасына ылайык Бишкек шаарынын бюджетинин эсебинен жүргүзүлөт.

7. Эсепке алуу жана отчёттуулук

1. Департаменттин иш-аракеттерин контролдоону Бишкек шаарынын мэриясы жүзөгө ашырат. Департамент өзүнүн иш-аракеттеринде Бишкек шаарынын мэриясына отчёт берет.
2. Департамент мыйзамдар тарабынан белгиленген тартипте жана аныкталган мөөнөттөрдө бухгалтердик жана статистикалык отчёттуулукту берет. Департаменттин иш-аракеттерин текшерүүнү ыйгарым укуктуу органдар, ошондой эле Кыргыз Республикасынын мыйзамдарына ылайык тийиштүү ыйгарым укуктарга ээ болгон уюмдар жүзөгө ашырат.
3. Департаменттин директору жана башкы бухгалтери Департаменттин финансы каражаттарын жана мүлкүн эсепке алуунун тууралыгы жана максаттуу пайдаланылышы үчүн жоопкерчилик тартышат, Кыргыз Республикасынын мыйзамдарына ылайык толук материалдык жоопкерчилик тартышат.

8. Департаментти кайра түзүү жана жоюу

1. Департаментти кайра түзүү жана жоюу Кыргыз Республикасынын мыйзамдарына ылайык жүзөгө ашырылат. 
2. Иш процессинде пайда болгон документтер жоюлган учурда «Кыргыз Республикасынын улуттук архив фонду жөнүндө» Кыргыз Республикасынын Мыйзамына ылайык сакталат жана пайдаланылат.